मौसम अपडेट

नेपाली पात्रो

विदेशी विनिमय दर अपडेट

राशिफल अपडेट

सुन चाँदी दर अपडेट

Title

प्रचण्डले नै पार्टीको मधेस प्रदेशको अवस्थाबारे जिल्ला तहबाटै रिपोर्टिङ लिने




१४ असोज, काठमाडौं ।
नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले पार्टीको मधेस प्रदेशको अवस्थाबारे जिल्ला तहबाटै रिपोर्टिङ लिने भएका छन् । मधेस प्रदेश कमिटी बन्न नसकेपछि मधेसका ८ जिल्लाको चुनावी गतिविधि र पार्टीका अन्य काम कारबाही प्रचण्डले सिधै जिल्लाबाट लिने भएका हुन् ।

आगामी मङ्सिर ४ गते प्रदेशसभा र प्रतिनिधिसभा चुनावको अवधिभर प्रचण्डले मधेसका ८ जिल्लाको अवस्थाको सिधै केन्द्रबाट हेर्ने पार्टीका पोलिटब्यूरो सदस्य विश्वनाथ साहले बताए । ‘पार्टीले मधेस प्रदेश कमिटी बनाउन सकेन । प्रदेशसभा र प्रतिनिधिसभा चुनाव आइसक्यो । अब प्रदेश कमिटी बनाउन सक्ने अवस्था पनि छैन,’ साहले भने, ‘अब मधेसका ८ जिल्लाको रिपोर्टिङ प्रचण्डले सिधै हेर्नुहुने छ, ती जिल्लाको निर्वाचन अवस्था, उम्मेदवार फाइनल लगायत सबै गतिविधि हेर्नु हुनेछ ।’

जिल्ला कमिटी बनिसकेकाले त्यहीँबाट प्रतिनिधित्व गर्ने केन्द्रीय सदस्य, पोलिटब्यूरो र स्थायी समितिसमेत सहभागी भएर पार्टीको काम गर्न निर्देशन दिइएको छ । ‘प्रदेश कमिटी नबने पनि जिल्ला कमिटी सबै जिल्लामा बनेका छन् । त्यो बैठकमा केन्द्रीय सदस्य, पोलिटब्युरो र स्थायी समिति तथा आवश्यक पर्दा पदाधिकारी पनि बस्न सक्नु हुने भयो । उहाँ सबै बसेर पार्टीको यथार्थ अवस्था सिधै केन्द्रमा रिपोर्टका साथ पुग्ने भयो,’ साहले भने, ‘अब प्रदेश कमिटी नबन्दा पनि पार्टीको चुनावी परिणाममा असर पर्दैन । सबै काम जिल्ला कमिटीले सक्रिय भई गर्नेछ ।’

प्रकाशित मिति : १४ आश्विन २०७९, शुक्रबार  १२ : १८ बजे