मौसम अपडेट

नेपाली पात्रो

विदेशी विनिमय दर अपडेट

राशिफल अपडेट

सुन चाँदी दर अपडेट

Title

ब्राजिली समर्थकको आग्रह– पेलेका लागि एकपल्ट विश्वकप जित



 

२१ मंसिर, काठमाडौं । विश्वकपमा आफ्नो टिमलाई समर्थन गर्न हजारौंको संख्यामा ब्राजिली समर्थकहरु यतिबेला कतारमा छन् । उनीहरु गाउँदै, नाच्दै आफ्नो टिमको हौसला बढाइरहेका छन् । तर, भित्री मनबाट आफ्ना ‘राजा’ पेलेको स्वास्थ्यका लागि मौन प्रार्थाना गरिरहेका छन् । ब्राजिलले जब दक्षिण कोरियालाई हराएर विश्वकपको नकआउट चरणमा प्रवेश पायो । त्यतिबेला समर्थकको एकमात्र आग्रह थियो– कृपया पेलेका लागि विश्वकप जित । पेले नामबाट विश्वभर परिचित एड्सन अरान्तेस डो नासिमेन्तो पेटको क्यान्सरबाट ग्रसित छन् । उनलाई स्वासनलीको संक्रमणका कारण गत साता अस्पताल भर्ना गरिएको छ । उनी ब्राजिलले सन् १९५८, १९६२ र १९७० मा विश्वकप जित्दा टिमका प्रमुख खेलाडी थिए ।

‘हाम्रो लागि पेले राजा हुन्,’ हातले टाउकोको काल्पनिक राजमुकुटतर्फ इशारा गर्दै एक ब्राजिली समर्थक अर्लेमले भनिन्, ‘हामी उनलाई माया गछौं । उनी हाम्रा आदर्श हुन् । उनको लामो उमेर र स्वस्थ जीवनका लागि प्रार्थाना गर्दैछौं ताकि उनी ब्राजिलले एकपल्ट अर्को विश्वकप जितेको देख्न सकुन् ।’ सन् २०२२ को विश्वकपका हेर्न कतार आएका थुप्रै समर्थक पेलेको महानताको किस्सा सुनेर हुर्किएका हुन् । उनीहरुले पेलेको गोलस्कोरिङ कौशलको पुरानो भिडियो देखेका छन् । केहि भाग्यशाली समर्थक पनि छन् जसले पेलेलाई प्रत्यक्ष खेल्दै गरेको देखेका थिए । सन् १९७० मा ब्राजिलले विश्वकप जित्दा कोलम्बियाका एक फुटबल समर्थक फ्लेमेंकोले पेलेलाई मेक्सिको सिटीमा इटलीसँगको फाइलन खेल्दै गर्दा देखेका थिए । उनले अल जजिरासँग भने, ‘पेले सधैं सर्वश्रेष्ठ फुटबलर रहिरहनेछन् ।’फ्लेमेंकोका अनुसार पेलेको उपलब्धिले उनलाई त्यो समयअघि र पछिका सबै फुटबलरभन्दा अलग बनाइदिएको छ । ‘डिएगो म्याराडोना पनि निकै उत्कृष्ट थिए । लियोनल मेस्सी एक अदभूत खेलाडी हुन् । तर, पेले रु उनले तीनपल्ट विश्वकप जितेका छन् । कसैले यो बराबरी कसरी गर्न सक्छ रु,’ फ्लेमेंको प्रश्न गर्छन् । पेलेको खेल हेरेर हुर्किएका कोलम्बियाली जोडी रुनी र मेरी पोर्टिलो पनि यो मान्यतासँग सहमत छन् । मेरी भन्छिन्, ‘जतिजति उनको कद बढ्दै गयो उनले यो खेललाई नयाँ उचाइमा लगे ।’ पेले ९२ खेलमा ७७ गोलका साथ ब्राजिलको सर्वकालीन सर्वाधिक गोलकर्ता हुन् । मेरीले सन् १९६० को दशकमा ‘जोगो बोनिटो (सुन्दर खेल)को अवधारण प्रस्तुत गर्ने श्रेय पेले र उनको ब्राजिली टिमलाई दिइन् । भनिन्, ‘ब्राजिली शैली सर्वश्रेष्ठ हुन्छ । उनीहरु जोगो बोनिटो खेल्छन् ।’

जारी विश्वकपमा ब्राजिलले दक्षिण कोरियासँग अन्तिम १६ को खेल खेल्दा थुप्रै जोगो बोनिटो खेल्न पाइएको थियो । उनीहरुले चार गोल गरे, त्योभन्दा धेरै गोलको सम्भावना देखाए । यो खेलका लागि ब्राजिली टिम स्टेडियम ९७४ मा उत्रिनुअघि उनीहरुले आफ्ना महान खेलाडीबाट सन्देश पाएका थिए । सोमबार आफ्नो इन्स्टाग्राम एकाउण्डमा पोष्ट भएको सन्देशमा पेलेले अस्पतालको शय्याबाट खेलको अपडेट लिइरहेको उल्लेख थियो । उनले लेखेका थिए, ‘म अस्पतालबाट खेल हेर्नेछु र तपाईंहरु सबैलाई समर्थन गर्नेछु ।’ ८२ वर्षीया पेलेले ब्राजिल टिमलाई कतारमा विश्वकप जितेर विश्वकप उपाधिमा आफ्नो कीर्तिमान विस्तार गर्न आग्रहसमेत गरेका छन् । खेलपछि ब्राजिली खेलाडीहरुले पेलेको तस्वीरअंकित ठूलो ब्यानर प्रदर्शन गर्दै समर्थकका साथ जितको खुसियाली मनाए । खेलाडीले आफ्नो जित पेलेका लागि समर्पित गरे । ब्राजिलका लागि पहिलो गोल गर्ने भिनिसियस जुनियरले भने, ‘उनलाई हामीबाट धेरै तागतको आवश्यकता छ र यो जित उनकै लागि हो । ताकि उनी यो अवस्थाबाट बाहिर आउन सकुन् र हामी उनका लागि विजेता बन्न सकौं ।’ पहेलो टिशर्टमा आएका ब्राजिली समर्थकहरु जसलाई ब्राजिलकै टिमको हिस्साका रुपमा मान्निछ । उनीहरु टिमको जितमा निकै खुसी थिए । तर, पेलेको नाममात्र ले पनि उनीहरु भावनात्मक रुपमा संवेदनशील हुन्छन् । साओ पाउलोका रेनाटो पेलाक्वीमले ब्राजिलका थुप्रै पुस्ताका लागि पेलेको अर्थ यसरी बुझाए, ‘उनले आफ्नो फुटबल शैलीका साथ ब्राजिललाई विश्व मानचित्रमा उभ्याए र ब्राजिलका मानिसका लागि थुप्रै वर्षको आशा र खुसी लिएर आए । तीनपल्ट विश्वकप जिताएर उनले हामीलाई असिम खुसी दिए जसले वर्षौदेखि दुःख र कठिनाई झेलिरहेका थिए ।’ पेलाक्वीमका अनुसार ब्रजिलको नयाँ पुस्ताका स्टारहरुले आफ्ना नायकका लागि एक कदम अगाडि बढेर सम्मान गर्ने समय आएको छ । ‘हाम्रो देश फेरि पनि आर्थिक र राजनीतिक उथलपुथलबाट गुज्रिरहेको छ । त्यसैले हामीलाई यो टिमको आवश्यकता छ । उनीले पनि पेलेले जस्तै गरुन्, मानिसहरुको पीडा भुलाइदिउन् । र, निश्चित रुपमा पेलेको अन्तिम इच्छा पूरा गरिदिउन् ।’

प्रकाशित मिति : २१ मंसिर २०७९, बुधबार  ३ : २८ बजे